der Advent

was es da nicht alles so gibt

eine meiner liebsten Weihnachtsgeschichten ... und wers braucht, der kriegt auch ne Übersetzung dazu

(Autor: 10 Jähriger Junge aus Bayern – Name unbekannt)

Der Apfend is de schenste Zeit im Winta.
De meisten Leit habm im Winta a Grippn. De is mit Fieber. Mir ham a oane, aba de is mit Beleichtung und man schreibts mit ´K´.

Drei Wocha bevor´s Christkindl kimmt, steit da Baba de Kripp´n im Wohnzimma auf und mei gloane Schwesta und i derma mithelfa.

Vui Kripp´n san fad. Aba de unserne ned, wei mia ham mordsdolle Figurn drin. I hob amoi an Josef und s´Christkindl auf´n Ofa g´steit, dass ses sche warm ham – aba des war eahna z´hoass. S´Christkindl is schwarz worn und an Josef hats in lauta Drümma zrissn. Oa Fuaß vo eahm is bis in Platzldoag g´flogn und des war koa schena Anblick. Mei Mamma hat mi g´schimpft und g´sogt, das ned amoi de Heiligen vor meiner Bledheit sicha san. Wenn d´Maria ohne Mo und ohne Kind rumsteht, schaugst ned guad aus.Aba i hob Gott seidank vui Figurn in meina Spuikistn – und da Josef is jetzt da Donald Duck. Ois Chistkindl woit i an Asterix nehma, wai der ois einziga so gloa is, dass‘a in Fuadertrog passt.Aba da hod d´Mama g´sogt, ma ko doch ois Chistkindl koan Asterix hernehma, do is ja no as verbrennte Christkindl bessa. Es is zwar schwarz, owa immerhin no a Christkindl.

Hintan Christkindl stengan zwoa Oxn, a Esl, a Nilpferd und a Brontosaurier. Des Nilpferd und den Saurier hob i hig´stellt, wei da Ox und da Esl warn ma z´fad.

Links neba den Stoi kemman grod de heilign drei König daher. Oa König is an Papa im letzten Adpfend beim Putzn obe g´foin und er war total hi. Jetzt hama nur mehr zwoa heilige Kenig und an heiligen Batman als Ersatz.Normal hom de heiligen Kenig an haufa Zeig für´s Christkindl dabei, nämlich Goid, Weihrauch und Pürree – oda so ähnlich … Vo de unsan hod oana anstatt Goid a Kaugummipapierl dabei, des glänzt so sche. Da anda hot a Marlboro in da Hand, wei ma koan Weihrauch ham. Aba de Marlboro raucht a recht sche, wenn mas ozündt. Da heilige Batman hat a Pistoin dabei. Des is zwar koa G´schenk füa a Christkindl, aba damit konn er´s vom Saurier bschütz´n.

Hinta dene drei Heilige san a por rotheitige Indiana und a kaasiga Engl. Den Engl is a Fuaß obbrocha, drum haman auf a Motorradl g´setzt, daß er si leichta tuat. Mit´n Motorradl kann er fahrn, wenn er grod net fliagt.

Rechts nebam Stoi hamma a Rotkäppchen hig´steit. Si hod a Pizza und drei Weißbier füa d´Oma dabei. An Woif hama ned, drum lurt unta am Baam a Bummerl ois Ersatzwoif viara.

Mehr steht in unsara Kripp´m ned drin, owa des reicht a. Auf d´Nacht schoit mas Liacht ei und dann is unsa Kripp´m erscht so richtig sche. Mia sitz ma olle do und sing ma Liarda vom Apfend. Manche gfoinma, owa de meistn san ma z´luasat.

Mei Opa hot ma amoi a Gedicht vom Apfend glernt, du des geht so:

Apfend, Apfend, da Bärwurz brennt,

erscht dringst oan, dann zwoa, drei, vier,

dann hauts´de mit deim Hirn an d´Dür.

Obwoi des Gedicht recht sche is, hot d´Muata gsogt, das i mir´s ned merka deaf.

Im Apfent werd a bastelt. Mir ham a große Schüssl voi Nussn und a gloane voi mid Goidstaub. Do drin wäiz‘ ma d‘Nussn bis se goidern san und‘s Christkindl hängts späda an Chrisbam one. Ma dearf gar ned fest schnaufa, wei da Goidstaub is dermaßn leicht und fliagt überoi umanand, wemma hie schnauft.
Oamoi hob i vorher in den Goidstaub a Niespuiver eine do und wia da Baba de erste Nussn drin gewäizt hod, hod‘er an Nieserer gmacht, dass ean grissn hod und sei Gsicht war goidern aba de Nussn ned. De Mama hod ean dann gschimpft wie‘er koane Beherrschung hod und se hod gsogt, dass‘er sich dümmer osteit ois a Kind. Dann war da Baba recht z´wieder und hod nimma mit do. Er hod nur gsogt, dass beim Goidstaub irgndwas ned stimmt. Ich hob mi g‘freid, wei’s war insgsamt a lustiga Apfentobnd.

Kurz vor Weihnachten miass ma unsre Wunschzedel schreibn. Mei Schwester wünscht si olawei Puppn oder so a Glump. Ich schreib vorsichtshoiba glei mehra Sachn drauf und zum Schluss schreib i am Christkindl, es soid oafach sovui kaffa, bis eam‘s Geid ausgeht. De Mama sogt, des is a Unverschämtheit und irgndwann bringt ma s‘Christkindl gar nix mehr, wei i ned bscheiden bin. Aber bis jetzt hob i imma wos griagt.

Und wenn i groß bin und a Geid verdien, dann kaff i ma seiber was und bin a überhaupt ned bscheiden. Dann ko sich’s Christkindl vo mir aus ärgan, wei dann is ma wurscht.

Bis ma schaut, is da Apfend voabei und d´Weihnacht a und mit dem Johr geht´s dahi. D´Gschenk san auspackt und man griagt vor Ostern nixmehr, höx´tns an Geburtstag

Aba oans is gwiß – da Apfend kimmt olawei wieda !!!